Ai 15 di Otubar Kultur Shock, Mellow Mood, Radio Zastava, Carnicats e tancj altris in conciert a Mortean a pro de “radio libare dai furlans”
foto di LORENZO CRASNICH
Il popul di Onde Furlane
Cuasi mil personis si son dadis dongje, sabide ai 15 di Otubar, ae seconde edizion di “Viva Onde Furlane” a Cjasielis di Mortean, te aree di Festintenda. Il public al è stât une fotografie dai scoltadôrs di Onde Furlane, simpri plui zovins e simpri mancul vergognôs di doprâ la lôr lenghe. Ancjemò une volte, duncje, Radio Onde Furlane e conferme di jessi une des realtâts culturâls plui seguidis e preseadis dal teritori, ancje se cheste atenzion dispès no ven condividude de politiche regjonâl.L’event al à dât une cerce di ce che di miôr si pues scoltâ in dì di vuê in Friûl. A tacâ dal rock’n’roll salvadi di Ulisse e i Ciclopi, dai simpri coinvolzents Carnicats e dal miôr grup ROC de Cjargne: Mig 29 over Disneyland, savoltants inte gnove formazion a cuatri. E po dopo la Orchestra Cortile, che e je daûr a segnâ une gnove strade pe cjançon di autôr furlane, i Radio Zastava che a àn alçât la temperadure de fieste fasint tacâ lis danzis che a son ladis indenant prime cui ospits americans Kultur Shock e la lôr misture fantastiche di punk, balkan e metal, e po cui simpri plui brâfs Mellow Mood, il miôr grup reggae talian dal moment. Grant finâl cul bum bum tecnologjic dai Arbeiter e, dilunc vie de serade, ancje la musiche dai dj di Onde Furlane.“Viva Onde Furlane” e je stade inmaneade de associazion “Lenghis dal Drâc – Amîs di Onde Furlane” cul jutori des associazions “Il Cantîr” di Mortean e Hybrida.
