Il pont su lis misuris di tutele de lenghe furlane
Intant de visite in Friûl dal Comitât Consultîf dal Consei de Europe su la Convenzion cuadri pe protezion des minorancis nazionâls, il Comitât 482 al à presentât une relazion su lis misuris di tutele e di promozion de lenghe furlane. Intal document si fâs il pont su la metude in vore de leç statâl 482/99 e de gnove leç regjonâl sul furlan, ma ancje su la situazion des risorsis e sui prejudizis che a compagnin ancjemò la politiche linguistiche pal furlan. Achì us proponìn la version integrâl dal rapuart dal Comitât 482 di podê discjariâ e lei cun calme.
Friulani e sloveni insieme nella storia e alla radio
Onde Furlane e fevele ancje par sloven. Vincj dîs indaûr e je tacade su lis frecuencis de «radio libare dai furlans libars» (90 Mhz pe plui part dal Friûl, 90.2 Mhz e 106.500 Mhz in Cjargne, www.ondefurlane.eu par dut il mont) une gnove trasmission setemanâl di atualitât che e va in onde il Vinars aes dôs dopodimisdì. Il program si clame “Pismo iz Benečije” e al è curât di Davide Clodig e Marina Cernetig dal Inštitut za slovensko kulturo. La presince dal sloven su Onde Furlane no je une novitât, stant che e dopre il furlan inte plui part de sô programazion, ma di simpri e da spazi ancje a chês altris lenghis dal Friûl, dal Friûl pal mont e dal mont in Friûl. “Pismo iz Benečije” si insuaze intune lungje tradizion di colaborazion che no si palese dome tal setôr dai media, là che, par esempli, tal palinsest di Radio Spazio 103 dongje dai programs par talian si cjatin trasmissions tant che “Okno v Benečjio” o “Gjal e copasse”, ma ancje te ativitât di cetantis associazions o ben tal Comitât/Odbor/Komitaat/Comitato 482. Une cooperazion che e à lis sôs lidrîs in secui di convivence e lis sôs motivazions te dibisugne comune di promovi il pluralisim culturâl e difindi i dirits linguistics, lant daûr di un troi segnât dal pinsîr, de azion e de sensibilitât di personaçs tant che Luigi Faidutti, Josef Marchet o Celso Macor. Cundut achel, al esit ancje un altri Friûl – lu marcave pôc timp indaûr Lucia Burello intun articul su Boris Pahor – che si è mot e si môf intune altre direzion, tra ignorance e prejudizis: un ciert Friûl, magari cussì no, che al pâr antisloven e duncje, ancje par chest, al pâr ancjemò di plui antifurlan.
