Sul palc si son alternâts 12 grups in rapresentance di ancjetantis lenghis e regjons di Europe. La serade si è vierte cuntun regâl inspietât: une version splendide di “Tu tramontis” fate dai Mitili FLK insiemi a Lino Straulino e cierts elements dai Luna e un Quarto.

La jam session e à dât principi a une serade musicâl di cualitât ecelente, condote in maniere magjistrâl di Karolina Cernic e Michele Polo che a àn savût presentâ grups, lenghis e gjenars musicâi alternant lenghe furlane e inglese.

I vêrs protagoniscj dopo, a àn cjapât e inmagât il public cu lis lôr performance. A àn viert il concors i Noid, grup interessant kareliano che al unìs lis sonoritâts de lenghe veps ae energjie dal rock plui contemporani. E’ stade dopo la volte di Rezia Ladine, zovin cjantant jazz dal cjanton svuizar dai Grisons, che al à inmagât il public cu la sô vôs intense.

La energjie al stât pûr dai Coffeschock company al à scjassât il Teatri, compliçs ancje i di là sessante supperter rivâts in maniere direte dal Burgenland. Atmosferis plui soft e rangjament tant perfet cun Priska e la sô “Hajira”. Dal Friûl si è passâts dopo aes atmosferis scozesis cui Macanta: sîs elements che a tornin a interpretâ la musiche gaeliche doprant i stumenti de tradizion. I sami Rollfa, invezit, a àn inmagât il public cuntune version tant moderne e contaminade, dal joik, il cjant tradizionâl sami de Laponie.

Infin, la gare si è sierade cui ritmis irlandês di Aoife Scott silabâts di violin e percussions. Il spietâ par cognossi i nons dai doi vincidôrs e je stade jemplade di une esibizion inedite di hip hop: mc’s e breakdancers a àn scjassât il foyer dal teatri. Furlan, sart, ocitan e frison si son messedâts e amalgamâts sul palc a dimostrazion di cetant che vitâi, universâls e versatilis a sedin chestis lenghis. Infin lis premiazions. Sfide al ultin vôt pal prin premi, assegnât de jurie internazionâl, che e à premiât la cjantautore frisone Janna Eijer e il so toc 1 klap. Seconts dome cun doi ponts di distac i udmurti Silent Woo Gore.Vincidôrs assolûts dal premi dal public (sedi chel presint in sale, sedi chel che al à votât on line sul sît www.liet.nl) i cravuats dal Burgenland Coffeschock Company.

I premis a son stâts consegnâts dal president de ARLeF, dott. Lorenzo Zanon, e di mr. Alexey Kozhemyakov, Cap de Segretarie de Cjarte europeane pes lenghis regjonâls o minoritariis dal Consei di Europa. La serade e je stade un grant sucès, a dimostrazion de professionalitât dai organizadôrs (Radio Onde Furlane e Cooperative Il Cjamp), ma soredut a dimostrazion de vitalitât des lenghis minoritariis europeanis.

Apontament al an prossim cul Liet International 2012.

Par secui a dilunc chê e je stade viodude tant che une gnot incjantade là che no si incrosavin dome agns e stagjons, ma ancje il mont dai vîfs e chel dai muarts, il mont dai oms e chel des creaturis magjichis.

La Gnot dai Muarts – come che si le clamave in Friûl – e viodeve i paîs furlans scjavaçâts des processions dai muarts, animis che par une gnot a tornavin dal mont di là, intant che lis lôr fameis a metevin fûr cjaldîrs plens di aghe par che a podessin distudâ la lôr sêt.

Une gnot cun significâts profonts e dispès dismenteâts, ma che no à ancjemò pierdût dal dut la sô cjarie di magjie.

Ai 15 di Otubar Kultur Shock, Mellow Mood, Radio Zastava, Carnicats e tancj altris in conciert a Mortean a pro de “radio libare dai furlans”

Dopo dal sucès straordenari dal an passât, cu passe 1.500 personis e un grant numar di zovins, e torne “Viva Onde Furlane”, la fieste – conciert di autofinanziament metude adun de storiche emitente che si conferme une des realtâts culturâls furlanis plui seguidis e preseadis. L’apontament si tignarà ai 15 di Otubar, a tacâ des sîs sot sere (18.00), alì de aree di Festintenda a Cjasielis di Mortean (10 euros di jentrade).I efiets dai tais pesants che la aministrazion regjonâl e à fat sui invistiments pe tutele de lenghe furlane si fasin sintî ancjemò, massime su chei che al è in prime linie intal promovi e intal doprâ la lenghe proprie dal Friûl. Cun di fat, cundut di cualchi piçul segnâl di cambiament, lis risorsis pes trasmissions radiotelevisivis par furlan previodudis des leçs regjonâls di tutele a son lontanis di ce che al coventarès.La fieste – conciert e je duncje une rispueste a ducj chei che in Regjon a van dilunc cu la politiche di limitazion des ativitâts di tutele e di promozion dal furlan, setôr là che Onde Furlane e davuelç une funzion di prin plan no dome cu la sô programazion radiofoniche, ma ancje cuntune vore di altris progjets. Poiâ la radio, dut câs, al vûl dî ancje difindi une vôs libare e indipendente che e contribuìs al pluralisim de informazion regjonâl, cence dismenteâ po la impuartance che la emitente e à intal sburtâ lis produzions musicâls di chenti.Nol è un câs, di fat, se ancjemò une volte “Viva Onde Furlane” e pues poiâsi sul contribût volontari di cetancj rapresentants de sene musicâl furlane e no dome. Cussì, sul palc de manifestazion, si podarà viodi un pôcs dai ultins nons di Musiche Furlane Fuarte (etichete di riferiment de radio) tant che Ulisse e i Ciclopi e Orchestra Cortile, che a àn vinçût lis ultimis edizions dal Premi Friûl, e i Mig 29 Over Disneyland che a presentaran la ultime produzion discografiche di MFF, o sei il cd “2+2 nol fâs 4”. A sunaran po ancje i innomenâts Carnicats, i spetacolârs Radio Zastava, i eletrics-ipnotics Arbeiter e i Mellow Mood, un dai grups miôr dal panorame reggae talian che pe ocasion a varan tant che ospit speciâl DJ Tubet. Il moment plui spietât de serade al è però chel de esibizion dai Kultur Shock, grup american in stât di traspuartâ il public cul so miscliç potent di grunge, balkan e metal. Chê di Cjasielis, tra l’altri, e je la uniche tape intal stât talian de lôr tournée europeane.Ae musiche dal vîf dai grups si alternaran i DJ sets di Gerovinyl, Green Beats, Tommy, Tunnel, Sister Blister, Abrasive, Stîl Salvadi, Notonlynoise e Hybrida: ducj protagoniscj dai dopodimisdîs e des seradis musicâls de radio.Dal numar grues di telefonadis e di adesions za rivadis par mieç dai social networks, ancje chest an “Viva Onde Furlane” si presente tant che un event in stât di confermâ la grande poie popolâr che cheste radio e à simpri vût intai siei passe trente agns di storie. Un segnâl che ancje lis istituzions a fasaressin ben a tignî cont. “Viva Onde Furlane” e je inmaneade de associazion “Lenghis dal drâc – Amîs di Onde Furlane”, nassude propite cun chê di meti adun iniziativis par judâ la “radio libare dai furlans”, cu la colaborazion dal circul “il Cantîr” di Mortean e cun Hybrida.

Il popul di Onde Furlane

Cuasi mil personis si son dadis dongje, sabide ai 15 di Otubar, ae seconde edizion di “Viva Onde Furlane” a Cjasielis di Mortean, te aree di Festintenda. Il public al è stât une fotografie dai scoltadôrs di Onde Furlane, simpri plui zovins e simpri mancul vergognôs di doprâ la lôr lenghe. Ancjemò une volte, duncje, Radio Onde Furlane e conferme di jessi une des realtâts culturâls plui seguidis e preseadis dal teritori, ancje se cheste atenzion dispès no ven condividude de politiche regjonâl.L’event al à dât une cerce di ce che di miôr si pues scoltâ in dì di vuê in Friûl. A tacâ dal rock’n’roll salvadi di Ulisse e i Ciclopi, dai simpri coinvolzents Carnicats e dal miôr grup ROC de Cjargne: Mig 29 over Disneyland, savoltants inte gnove formazion a cuatri. E po dopo la Orchestra Cortile, che e je daûr a segnâ une gnove strade pe cjançon di autôr furlane, i Radio Zastava che a àn alçât la temperadure de fieste fasint tacâ lis danzis che a son ladis indenant prime cui ospits americans Kultur Shock e la lôr misture fantastiche di punk, balkan e metal, e po cui simpri plui brâfs Mellow Mood, il miôr grup reggae talian dal moment. Grant finâl cul bum bum tecnologjic dai Arbeiter e, dilunc vie de serade, ancje la musiche dai dj di Onde Furlane.“Viva Onde Furlane” e je stade inmaneade de associazion “Lenghis dal Drâc – Amîs di Onde Furlane” cul jutori des associazions “Il Cantîr” di Mortean e Hybrida.

And the winner is….. Ulisse e i Ciclopi

Archiviade cun grande sodisfazion la edizion estive speciâl dal Premi Friûl 2011, che si è davuelte ai 19 di Avost tal Parc dal Cormôr a Udin, cu la colaborazion di Homepage Festival. Tra i grups partecipants (Umorinstabili, Sunrise, Trio Tubazzi, (H)ausbau, Ulisse e i Ciclopi) la jurie e à sielt Ulisse e i Ciclopi cun cheste motivazion: “In linie cul regolament che al previôt di rignuvî e sperimentâ la forme cjançon in lenghe furlane, il premi al ven assegnât a Ulisse e i Ciclopi, par vê vût cûr di proponisi cuntune formazion dal dut gnove tal panorame musicâl furlan”. E il cûr  nol è mancjât ae zovine formazion di Mortean, Ulisse Viezzoli, 19 agns (vôs e ghitare) e Moreno Fedele, 23 agns (batarie), che a àn musicât une poesie di Lussia di Uanis (La rivoluzion) e sdrondenât i lôr struments miscliçant la tradizion dal blues al rock plui rumorôs e psichedelic. Par lôr cumò la oportunitât di realizâ un cd pe etichete Musiche Furlane Fuarte.

download: Rassegne stampe PF2011 (540.77KB) added: 22/08/2011 clicks: 136 description:

 

download: Rassegne stampe PF2011-2 (4.50MB) added: 22/08/2011 clicks: 148 description:

 

download: Ulisse e i Ciclopi - RivolusionMP3 (3.82MB) added: 23/08/2011 clicks: 136 description:

Lis trasmissions che a jerin stadis cjapadis dentri intes convenzions cu la Regjon Autonome Friûl – Vignesie Julie a son stadis pe plui part suspindudis (al è il câs di Internazionalitari, Lasimpon, Flabis a mirinde) o limitadis (Ator Ator, Ce Fâ, Schiribicilu).

I nestris spazis di informazion gjornalistiche a son stâts scurtâts cuasi al limit (radiogjornâi de buinore e di misdì e dîs, e rassegne stampe), ma no gjavâts dal dut, di maniere di lassâi ai nestris scoltadôrs dai spazis minims di informazion indipendente.

Tal spazi dal Ator Ator us proponìn une cerce dal nestri archivi storic, dal 1980 ai 1996, cu lis vôs di chei che a son stâts i protagoniscj de culture, de politiche e des bataiis storichis dal Friûl inta chei agns: no je dome une maniere par cuvierzi la riduzion di oris de redazion, ma ancje par mostrâ ce che si à fat tai passe 30 agns di storie di Onde Furlane e par viodi se e trop che al è cambiât il Friûl ta chest periodi.

Tes prossimis zornadis us comunicarìn plui in detai la gnove programazion de emitente.

Nus displâs par ducj chei che a son usâts a scoltânus ogni dì, ma magari cussì no pal moment no jerin soluzions alternativis. O ricuardìn che ducj a puedin dâ une man sei cun donazions, sei cul comprâ lis nestris produzions.

Cun stime,

Mauro Missana
Diretôr responsabil di Radio Onde Furlane

Il riviel popolâr furlan de Joibe Grasse dal 1511

A cjaval tra Cuatricent e Cinccent, la nobiltât furlane e je organizade in dôs gruessis fazions: i Strumîrs e i Çambarlans. I prins a metin adun la plui part dai nobii de Patrie dal Friûl: si trate di fameis slargjadis (une sorte di clans) che dispès a àn possessions, leams di parintât e ideologjics cul Imperi là che a cjatin chês pussibilitâts di “fâ cariere” che, invezit, sot di Vignesie a son riservadis dome ae oligarchie lagunâr. I seconts, sot de direzion de famee dai Savorgnans, la plui siore dal Friûl e la uniche iscrite ae nobilitât veneziane, a gjoldin di poiis e di leams cu lis autoritâts de Republiche. I Strumîrs a controlin il Parlament de Patrie, intant che i Çambarlans a controlin il Renc di Udin, a àn il comant des Cernidis (lis miliziis contadinis) e a ufrissin la lôr poie aes comunitâts rurâls intai scuintris cu la nobiltât locâl.
Il moment plui violent de faide tra chestis dôs fazions si lu à cuant che Antoni Savorgnan al cjape in man il comant dai Çambarlans. Di fat al è propit lui che di une bande al infuartìs la poie aes comunitâts rurâls impegnadis in scuintris simpri plui dûrs cuintri dai usurps nobiliârs e, di chê altre bande, al invie une politiche simpri plui autonome rispiet a Vignesie, forsit cul sium di trasformâ la Patrie tune siorie tes sôs mans.

A ingredeâ, inmò di plui chest cuadri, al è il conflit in vore tra Vignesie e l’Imperi, cui soldâts e i mercenaris dai doi stâts che a corin indenant e indaûr pal Friûl, copant, brusant e robant. Si trate di une vuere là che il Friûl al è la vitime principâl. Ta cheste suaze, Vignesie si cjate a vê di poiâsi inmò di plui sui Savorgnans cuintri dai Strumîrs filoimperiâi, ma ancje par tignî bogns i contadins e zovâsi dal jutori des Cernidis.
Ai 27 di Fevrâr dal 1511 il Carnavâl al è in plene. E je Joibe Grasse e la citât di Udin e je sfodrade di int rivade ancje des vilis dulintor. Une colone di contadins des Cernidis, tornade di une sbrisse fûr de citât là che e jere stade segnalade la presince di soldâts imperiâi, si cjate tal mieç di un scuintri tra i partidants des dôs fazions nobiliârs. E je la faliscje che e invie il fûc dal riviel: in curt i oms des Cernidis, judâts dai popolans di Udin e dai contadins rivâts dai paîs dongje de citât, a assaltin i palaçs de nobiltât e ju cjapin un daûr l’altri, ju metin a sac e ju brusin. I nobii, i armâts e i servidôrs che no rivin a scjampâ a vegnin copâts. Il lutignint venezian si siere tal cjistiel e nol interven. Par cuietâ il riviel udinês al à di rivâ un trop di cavalarie de place fuarte di Gardiscje, ma, ta chel jenfri, il partît strumîr al à za pierdût diviers dai siei oms di ponte.
Di Udin lis flamis de rivolte si slargjin intal rest dal Friûl. Organizâts in bandis di vuerilie, i contadins a cjapin, a metin a sac e a brusin i cjistiei di Breçà, Cergneu, Cjaurià, Colorêt, Cusan, Çopule, Darcjan, Feagne, Madrîs, Murùs, Porpêt, Prampar, Salvarûl, Sant Denêl, Spilimberc, Susans, Tarcint, Var, Vilalte e Voleson, ma ancje i palaçs dai nobii a Glemone, Tresesin, Tumieç e Vençon. Denant di un riviel che al è fûr di ogni control, i nobii furlans e lis autoritâts venezianis si dan dongje e daspò de vitorie otignude intune bataie in cjamp viert sui magrêts de Celine, a inviin la repression. La gjandusse e il taramot che a scjassin il Friûl subit daspò a dan il colp finâl al riviel ancje se, in ciertis jurisdizions tant che Sant Denêl e Spilimberc, la lote e va indenant par un biel toc.
Il riviel dal 1511 al è il moment plui alt, ma no l’ultin, di un conflit sociâl e politic che al à lidrîs lontanis. I contadins furlans di chei agns no son, come che ju à piturâts cualchidun, pipinots tes mans dal Savorgnan o di Vignesie. I rapresentants des comunitâts rurâls furlanis a rivin ta chei agns a imbastî une rêt “politiche” in stât fintremai di tratâ la lôr poie militâr a Vignesie daûr dal rispiet dai dirits e dai ûs tradizionâi. E je propite cheste cussience “politiche”, adun cu la rivolte dal 1511 e cui scuintris sociâi che a van inmò a dilunc inte Patrie, che e oblee Vignesie a ricognossi il dirit ae nassite di une rapresentance continuative des comunitâts rurâls furlanis che, tal 1533, e sarà istituzionalizade cul non di Contadinance. Un organisim unic intal panorame european di chê ete.
Daspò di chel dal 1511 no si varan in Friûl altris riviei cussì slargjâts, ma la violence sociâl e va indenant par secui tes campagnis furlanis cun formis e mûts diviers. La insurezion popolâr de Joibe Grasse, dut câs, e veve mostrât a ducj la fuarce dai contadins e e veve lassât a dilunc e a fonts une olme di pôre framieç de nobiltât. Il rivoc dal riviel al reste a dilunc ancje inte memorie dal popul furlan se e je vere che, inmò in dì di vuê, o ‘nt cjatìn la olme, si ben che smavide e strassomeade, intes contis popolârs là che si fevele di cjistiei sdrumâts e di cjistielans crudêi.

Dal confront tra esperiencis in Europe e in regjon a rivin il ricognossiment dal valôr economic de imprenditorie inte (e pe) lenghe e la indicazion operative a doprâ la lenghe proprie tant che “logo” par promovi il teritori e i siei prodots
Lis conclusions de cunvigne Minorancis linguistichis e imprenditorie. Lenghe, identitât, professionalitât organizade de cooperative Informazione Friulana pai siei trente agns di ativitât.

“Il muset si clame muset e no musetto”. Cheste frase, che e je saltade fûr dilunc de taule taronde  pomeridiane dedicade al rapuart tra lenghis, identitât e promozion dal teritori e dai siei prodots, e je une buine sintesi di almancul cierts dai contignûts de cunvigne Minorancis linguistichis e imprenditoriis. Lenghe, identitât, professionalitât – Minoranze linguistiche e imprenditoria. Lingua, identità, professionalità, che si è tignude a Udin ai 13 di Novembar
La iniziative, inmaneade de cooperative Informazione Friulana, societât editore di Radio Onde Furlane (www.ondefurlane.eu), inte suaze dal program di apontaments pe celebrazion dai trente agns de sô ativitât di imprese sociâl che e prodûs informazion e culture par furlan, e promôf la lenghe e la culture furlanis, e ufrìs servizis culturâi e informatîfs al Friûl “in Friûl” e a chel “intal mont”, e je stade une ocasion di confront tra diviersis esperiencis imprenditoriâls caraterizadis dal ûs di une lenghe minorizade intai media, te promozion turistiche, te ospitalitât, te ristorazion, te agriculture e tai servizis linguistics e culturâi.
La editorie par basc, che e je un esempli sei di resistence culturâl e di afermazion di dirits sei sul plan gjornalistic e dal management, la produzion audiovisive par galês che e espuarte i siei prodots par dut il mont, la minorance slovene in Italie cu la sô organizazion economiche e lis sôs specializazions imprenditoriâls, i ladins des Dolomitis che a tegnin adun la promozion turistiche e la valorizazion de proprie identitât a rapresentin realtâts une vore diferentis, ma a dimostrin dutis cemût che lenghe proprie e identitât culturâl a dan une marcje in plui ae economie.
Joan Mari Larrarte, aministradôr dal grup Berria, che dongje di publicâ il cuotidian omonim e une serie di periodics al è presint su internet cun sîts informatîfs e web tv e al opere intal cjamp televisîf locâl, al à ilustrât lis carateristichis organizativis de societât e a ‘nd à marcât la funzion strategjiche inte promozion dal euskara, lenghe doprade ogni dì par contâ il mont e il Paîs Basc, e la sô impuartance economiche, cun plui di 300 dipendents, tra gjornaliscj, tecnics, grafics, aministratîfs e altris figuris professionâls.
La cooperative Informazione Friulana, che la sô ativitât trentenâl e je stade presentade di Carli Pup, component dal consei di aministrazion, e pues contâ su numars plui bas (a son siet i dipendents a timp indeterminât), ma chel istès – tra radiofonie e internet, produzions audiovisivis e musicâls e la informazion ufierte ogni dì cun diviers struments al Friûl “in Friûl” e a chel “intal mont” – e condivît cul grup basc la professionalitât intal cjamp de comunicazion doprant la lenghe proprie, la funzion strategjiche di servizi public intal promovi la lenghe minorizade e il fat di jessi une imprese che e cree ocupazion.
L’intervent di Licio De Clara de cooperative furlane Serling e la relazion di Antonio Ignazio Garau de societât Altra Cultura di Aristanis (Sardegne) a àn confermât cemût che al sedi pussibil disvilupâ imprenditorie e gnovis professionalitâts “in”, “cun” e “par” lis lenghis minoritariis. De Sardegne, compagn che dal Friûl e dal Paîs Basc, a son rivâts stimui comuns, tant che l’invît aes istituzions publichis a premiâ la cualitât e la professionalitât di ce che al ven fat intes lenghis minoritariis, a no calcolâ chest setôr dome tant che un ambit di caratar culturâl – un “di plui” o alc di “no indispensabil” di “taiâ” in timp di crisi – e di tignîlu par ce che al è pardabon: garanzie di dirits fondamentâi e risorse economiche speciâl, di “disfrutâ” plui e miôr, propit intai moments di dificoltât.

A son indicazions marcadis cui fats ancje de esperience di Cwmni Da, une des societâts di produzion audiovisive dal Gales plui grandis e dinamichis, specializade tal ideâ e tal meti adun prodots destinâts ae tv in cymraeg, che e conferme sei il valôr professionâl dal ûs de lenghe proprie sei il fatôr competitîf che cheste e rapresente, se si ten cont che finzion, documentaris e cartons animâts par galês, dopo jessi stâts mandâts in onde di S4C, il canâl regjonâl de BBC, a vegnin dopleâts in cetantis altris lenghis e vendûts a emitentis publichis e privadis che a operin in ducj i cinc continents.
Ma di là di jessi fatôr di disvilup di professionalitâts cualificadis e di prodots specifics intal cjamp de comunicazion, la specificitât lingustiche, culturâl e identitarie e pues deventâ un element par disvilupâ esperiencis imprenditoriâls specifichis – come tal câs de minorance slovene in Italie, che di jê al à fevelât il segretari de SDGZ_URES (Union regjonâl economiche slovene), Davorin Devetak – e un strument par promovi ancje altris setôrs produtîfs.
Su chest pont e à batût la responsabile dai progjets linguistics e culturâls dal Comun General de Fascia (Val di Fasse, Trentin), Sabrina Rasom, tal presentâ  i progjets disvilupâts dal ent locâl cui gjestôrs dai albiercs e cun altris imprenditôrs locâi, là che si rive a perseguî il dopli fin di promovi lenghe, identitât e teritori e fidelizâ i  turiscj, che a cjapin cussience di jessi ospits, in cualsisedi stagjon, di un lûc e di une comunitât che a son “speciâi”.
Il teme dal marketing teritoriâl e de promozion dal teritori tant che “prodot” e “sisteme di prodots e servizis”, cu la atenzion pontade prin di dut su turisim, enogastronomie, ristorazion e agroalimentâr, al è stât disvilupât ancjemò vie pal dopomisdì, cuntun confront tra esperts, imprenditôrs e operadôrs culturâi membris des minorancis furlane, slovene e gjermaniche dal Friûl-Vignesie Julie e di chê taliane in Slovenie e Cravuazie, rapresentade di Andrej Bertok, diretôr dal centri “C. Combi” di Cjaudistrie, che al à metût in evidence lis potenzialitâts ufiertis dal disvilup di azions di marketing teritoriâl condividudis des minorancis che a vivin di ca e di là dal confin talian-sloven.
Dal economist de Universitât dal Friûl, Francesco Marangon, e je rivade la documentade indicazion operative a valorizâ lenghe, culture e identitât tant che element che al rint plui ricognossibii, e duncje plui di atrat, un ciert teritori e ce che chel al prodûs. Chest al vâl sei pai nons dai prodots (il muset, par esempli), sei pai nons dai lûcs (cu la cartelonistiche bi- o plurilengâl che e devente une vere etichetadure dal teritori), sei pal fat che, compagn che intai câs nostrans di Resie, Sauris e Tamau (o di altris piçulis comunitâts linguistichis tant che chês grecanichis di Calabrie e Salent), la specificitât linguistiche e devente pardabon un element di atrat, cemût che a àn ricuardât Luigia Negro dal circul Rozajanki Dum e Velia Plozner dal circul “G. Unfer”.
Il pont di viste imprenditoriâl su chest argoment al è rivât di Giovanni Petris, titolâr dal Prosciuttificio Wolf di Sauris, che al à marcât la impuartance di dut ce che al è specific di une comunitât pe sô difese e pal so disvilup, di Oscar Olivo che al à ricuardât di vê pontât su lenghe, teritori e specialitât “a chilometri zero” pe sô locande A la Patrie dal Friûl di Cjampfuarmit, e di Michele Venier, di www.friulpoint.it, che cun maiutis e gadgets par furlan si è creât une piçule aree di marcjât e a so mût al concor a promovi sei la lenghe inte societât sei il Friûl e i siei prodots.
A son intervignûts ancje l’assessôr regjonâl pe culture, Elio Di Anna, il vicesindic di Udin, Enzo Martines, e Federico Verzegnassi, component de zonte de CCIAA di Udin, che al à manifestât l’interès de Cjamare di Cumierç, impegnade intal progjet “Friuli Future Forum”, pes tematichis frontadis dilunc de cunvigne, che i siei lavôrs a son stâts introdusûts dal president di Informazione Friulana, Pauli Cantarut, e concludûts dal vicepresident de cooperative, Lorenzo Fabbro.
Passe sessante agns indaûr Pier Paolo Pasolini al esprimeve la sperance che i furlans a cjapassin cussience de lôr lenghe, de lôr tradizion e dal lôr passât. Che al sedi rivât il moment di vê cussience dal fat che lenghe, identitât e teritori a puedin deventâ risorsis par fâ sù ancje l’avignî? In Europe si fâs cussì.

]]> http://www.ondefurlane.eu/lenghe-e-identitat-a-zovin-a-economie-e-disvilup/feed/ 0 http://www.ondefurlane.eu/friulani-e-sloveni-insieme-nella-storia-e-alla-radio/ http://www.ondefurlane.eu/friulani-e-sloveni-insieme-nella-storia-e-alla-radio/#comments Wed, 19 May 2010 17:14:56 +0000 francesca http://www.ondefurlane.eu/?p=3161 Friulani e sloveni insieme nella storia e alla radio

Onde Furlane e fevele ancje par sloven. Vincj dîs indaûr e je tacade su lis frecuencis de «radio libare dai furlans libars» (90 Mhz pe plui part dal Friûl, 90.2 Mhz e 106.500 Mhz in Cjargne, www.ondefurlane.eu par dut il mont) une gnove trasmission setemanâl di atualitât che e va in onde il Vinars aes dôs dopodimisdì. Il program si clame “Pismo iz Benečije” e al è curât di Davide Clodig e Marina Cernetig dal InÅ¡titut za slovensko kulturo. La presince dal sloven su Onde Furlane no je une novitât, stant che e dopre il furlan inte plui part de sô programazion, ma di simpri e da spazi ancje a chês altris lenghis dal Friûl, dal Friûl pal mont e dal mont in Friûl. “Pismo iz Benečije” si insuaze intune lungje tradizion di colaborazion che no si palese dome tal setôr dai media, là  che, par esempli, tal palinsest di Radio Spazio 103 dongje dai programs par talian si cjatin trasmissions tant che “Okno v Benečjio” o “Gjal e copasse”, ma ancje te ativitât di cetantis associazions o ben tal Comitât/Odbor/Komitaat/Comitato 482. Une cooperazion che e à  lis sôs lidrîs in secui di convivence e lis sôs motivazions te dibisugne comune di promovi il pluralisim culturâl e difindi i dirits linguistics, lant daûr di un troi segnât dal pinsîr, de azion e de sensibilitât di personaçs tant che Luigi Faidutti, Josef Marchet o Celso Macor. Cundut achel, al esit ancje un altri Friûl – lu marcave pôc timp indaûr Lucia Burello intun articul su Boris Pahor – che si è mot e si môf intune altre direzion, tra ignorance e prejudizis: un ciert Friûl, magari cussì no,  che al pâr antisloven e duncje, ancje par chest, al pâr ancjemò di plui antifurlan.