Radio Onde Furlane » Informazion

Dal Consei

francesca — Thu, 02 Dec 2010 17:12:37 +0000

Dal Consei al è un program realizât de redazion di Radio Onde Furlane cu la poie de Regjon Autonome Friûl – Vignesie Julie daûr di un progjet inviât in cunvigne cu la presidence dal Consei regjonâl. Inte edizion Autun – Invier dal 2010 il program al va in onde ogni sabide di 10 a 11 di buinore e in repliche la domenie di misdì e mieç a une e mieze. Il program al previôt dôs pontadis une daûr la altre: une, par cure di Piero Cargnelutti, e propon intervistis ai conseîrs regjonâi sui temis che a vegnin frontâts dilunc vie de setemane sei inte aule dal Consei regjonâl, sei dentri des diviersis Comissions. Chê altre, invezit, e je condusude in studi di Mauro Missana e e previôt la partecipazion in direte di conseîrs regjonâi di aree politiche divierse che si confrontin su temis di strente atualitât. Si àn po pontadis dedicadis in maniere specifiche ai organisims leâts al Consei regjonâl tant che Corecom, tutôr dai minôrs, e v.i.

Pontadis dai 2 di otubar. Prime pontade. Ta cheste prime pontade si à une interviste al gnûf president dal Consei regjonâl Maurizio Franz (LN), che si è insediât ae fin di Setembar e che al à cjapât il puest dal so coleghe di partît Eduard Ballaman, che al à scugnût lassâ la incarghe par vie de balfuerie sul ûs impropri de machine di rapresentance che lu à cjapât dentri. Il non di Franz al è stât fat indenant de direzion regjonâl de Leghe Nord che e veve proviodût a fâ dimeti Ballaman.	01 Dal Consei 02.10.10
Seconde pontade. Si fronte l’argoment dal disen di leç su la manutenzion, un proviodiment che al à introdusût inte legjislazion regjonâl il concet di “manutenzion de legjislazion”, ven a stâi la pussibilitât di tornâ a viodi e modificâ leçs fatis buinis in passât. Si trate di fissâ un criteri par puartâ indenant chestis modifichis. La leç, duncje, e interesse diviers setôrs: dal implant istituzionâl aes disposizions in materie di autonomiis locâls, fintremai a temis che a rivuardin il cumierç e la edilizie. In studi si àn vût i doi relatôrs in Consei (riunion dai 28 di Setembar) Alessandro Colautti (PdL) pe maiorance e Alessandro Corazza (IdV) pe minorance.	02 Dal Consei 02.10.10
Pontadis dai 9 di otubar Prime pontade: Si fevele des audizions tignudis ai 5 di Otubar in cuarte Comission dal Consei regjonâl cul assessôr Riccardo Riccardi domandadis dal Partît Democratic par savê cemût che a van indenant lis proceduris pai lavôrs che a interessin la tierce corsie de A4 Vignesie – Triest. Simpri in cuarte Comission si à scoltât ancje la Autoritât di bacin regjonâl, ae presince de Consulte di bacin e dai aministradôrs de zone interessâts dal plan pe difese idrauliche dal bacin dal Cuar, suntune zone che e va di Buie a Rivignan par une superficie di plui o mancul 73 chilometris cuadrâts, pal 71% di teren agricul, pal 11% di areis urbanis e pal 17% di boscs. Cuatri i sotbacins cui cors di aghe Palût, Cuar, Lins e Repudi. Intervistis a Alessandro Colautti (PdL), Paolo Menis (PD) e Gianfranco Moretton (PD).	03 Dal Consei 09.10.10
Seconde pontade: Si fevele dal disen di leç frontât in seste Comission su la valorizazion dal patrimoni fotografic regjonâl. Propit a chest mieç di espression a son stadis indreçadis dôs propuestis di leç, la prime presentade dal grup de LN e la seconde dai Cittadini, che a àn in comun il ricognossiment dal CRAF (Centri di ricercje e archiviazion de fotografie, 150 mil tra positîfs e negatîfs de Istrie al Friûl) di Spilimberc tant che centri di riferiment regjonâl pes ativitâts di ricercje, studi, racuelte, catalogazion, archiviazion, conservazion, digjitalizazion e valorizazion dal patrimoni fotografic dal nestri teritori. In studi Mara Piccin (LN) e Piero Colussi (Cittadini).	09 Dal Consei 30.10.10
Pontadis dai 16 di otubar Prime pontade: Si fevele dal progjet di leç pai aministradôrs di sosten, frontât in tierce Comission: une propueste di leç trasversâl di vot articui par promovi la difusion dal aministradôr par judâ i sogjets debui. Intervistis a Giorgio Venier Romano (UDC), Piero Camber (PdL), Paolo Menis (PD), Stefano Pustetto (SA – Çampe Arc di S. Marc).	05 Dal Consei 16.10.10
Seconde pontade: Si fronte la propueste di leç sul ordenament istituzionâl dai ents locâi dal Friûl – Vignesie Julie firmade di Franco Iacop (PD) e sotscrite ancje di chei altris conseîrs dal PD Gianfranco Moretton, Franco Brussa, Alessandro Tesini e Mauro Travanut. In studi Paolo Ciani (PdL) e Franco Iacop (PD).	06 Dal Consei 16.10.10
Pontadis dai 24 di otubar Prime pontade: La assessore regjonâl pal belanç Sandra Savino e à presentât in prime e in cuinte Comission il rindicont gjenerâl de Regjon pal esercizi finanziari 2009 che al à viodût mancul jentradis par 403,5 milions di euros. Intervistis a Franco Baritussio (PdL), Paride Cargnelutti (PdL), Franco Brussa (PD) e Alessandro Codega (IdV).	07 Dal Consei 23.10.10
Seconde pontade: Dibatiment in studi sul teme des compartecipazions su lis pensions che il Stât talian al à di dâi ae Regjon. Il president de Regjon, Renzo Tondo, e la assessore pal belanç Sandra Savino a son stâts sintûts in prime e in cuinte Comission dopo che il Guvier talian al à confermât i trasferiments su lis compartecipazions paiadis dai pensionâts de nestre regjon. Si trate di une tratative jenfri Stât e Regjon tacade inmò inte aministrazion precedente. Cumò il Guvier Berlusconi al à ricognossût ae nestre Regjon 480 milions pal an che al ven, e un pregrès pal 2008 e pal 2009 di 910 milions di euros. In studi Roberto Marin (PdL) e Alessandro Tesini (PD).	08 Dal Consei 23.10.10
Pontadis dai 30 di Otubar Prime pontade: Lis afermazions dal assessôr pe salût Vladimir Kosič sui indreçaments dal plan regjonâl pe sanitât, soredut in mert ai tais di ponts nassite e ae strente sui trasferiments, a àn stiçât il dibatiment tra i conseîrs regjonâi, massime di maiorance, che a àn otignût un incuintri tra i cjâfs grup par riviodi il document prime che al vegni fat bon. Intervistis a Daniele Galasso (PdL), Edoardo Sasco (UDC), e Alessandro Tesini (PD).	09 Dal Consei 30.10.10
Seconde pontade: Il Consei regjonâl al à fate buine cun 39 vôts a pro la petizion presentade di 2575 citadins che a domandin di garantî il timp plen intes scuelis dal Friûl – Vignesie Julie. Di chest si fevele in studi Enio Agnola (IdV) e Paride Cargnelutti (PdL).	10 Dal Consei 30.10.10
Pontadis dai 6 di Novembar Prime pontade: La leç comunitarie e je l’imprest tecnic che la Zonte e dopre par dâ cont dal stât des proceduris di infrazion e dai proviodiments legjislatîfs, regolamentârs o aministratîfs là che la Regjon, dilunc dal 2009, e à metût in vore il dirit comunitari; e je ancje il strument che il Consei al dopre par esercitâ lis sôs funzions di direzion e di control in materie di politichis comunitariis. Dut câs, la leç chest an no je stade votade in Consei par vie che la Zonte regjonâl, che e à il compit di inzornâle, e à presentât dome une relazion. Intevistis a Roberto Marin (PdL) e Franco Iacop (PD).	11 Dal Consei 06.11.10
Seconde pontade: Il Consei regjonâl al à votât la leç presentade dai conseîrs Galasso (PdL), Moretton (PD), Narduzzi (LN), Sasco (UDC), Kocijancič (SA), Colussi (Cittadini), e Asquini (Mist) par garantî il segnâl televisîf digjitâl in mont. La intenzion e je chê di dâi contribûts ae Rai par che e fasi i intervents che a coventin par cuvierzi zonis che se no no cjaparessin il segnâl. In direte, Franco Baritussio (PdL) e Sandro Della Mea (PD).	12 Dal Consei 06.11.10
Pontadis dai 13 di Novembar Prime pontade: In tierce Comission si à frontât lis dôs propuestis di leç su la tutele dai animâi di compagnie (la prime e je stade presentade di PdL e UDC e la seconde de Leghe Nord) e ancje il disen di leç pe autonomie dai zovins. Intervistis cun Massimo Blasoni (PdL), Roberto Antonaz (SA), Franco Codega (PD), e Roberto Novelli (PdL).	13 Dal Consei 13.11.10
Seconde pontade: Intant di une audizion in tierce e cuarte Comission dal Consei cu la comission regjonâl amiant si à frontât chescj temis: monitorament pe corete gjestion de discjarie di Purcie, slargjament dal control sanitari a dutis lis malatiis leadis al amiant pontant su la ricercje e su la diagnosi adore, ativazion di une campagne di informazion massive cuntune rêt di poie pes fameis dai esposcj al amiant e une rêt tra lis struturis sanitariis e l’INAIL pal coret ricognossiment des malatiis. In studi Giorgio Venier Romano (UDC) e Sergio Lupieri (PD).	14 Dal Consei 13.11.10
Pontadis dai 19 di Novembar Prime pontade: In cuarte Comission dal Consei regjonâl si à frontât il disen di leç sul plan regjonâl pes ativitâts estrativis, in pratiche i indreçaments par fissâ lis modalitâts par gjestî lis domandis di estrazion fatis indenant ai Comuns. Intervistis a Alessandro Colautti (PdL) e Mauro Travanut (PD).	15 Dal Consei 20.11.10
Seconde pontade: In tierce Comission si à presentât la relazion sui risultâts de leç pe riduzion des listis di spiete te sanitât, fate buine tal Lui dal 2009. Il teme al è stât frontât in direte cun Massimo Blasoni (PdL) e Stefano Pustetto (SA).	16 Dal Consei 20.11.10
Pontadis dai 27 di Novembar Prime pontade: Intun referendum che si è tignût intal 2008 a Sapade si à vût un 95% di sì a pro dal passaç de Regjon Venit al Friûl – Vignesie Julie. A chel referendum al veve partecipât il 71% dai citadins cun dirit di vôt. Il Consei regjonâl, ducj dacuardi (fale che par une astension), al à dât la sô poie a chê domande par sburtâ la Cjamare dai deputâts e il Senât talian a intervignî. Il vôt in Consei al è duncje un invît indreçât al Guvier e al Parlament talian. Intervistis al president dal Consei regjonâl Maurizio Franz (LN), e a Enore Picco (LN), Franco Iacop (PD), e Piero Camber (PdL).	17 Dal Consei 27.11.10
Seconde pontade: Daûr dai indreçaments de norme proponude dal ministri Roberto Calderoli, la maiorance in Regjon e à preparât un test di leç sui tais ai coscj de politiche. La cuestion e je stade frontade intes riunions dal Consei regjonâl, ma no si à rivâts a di un vôt finâl. In direte Roberto Asquini (Grup Mist) e Gianfranco Moretton (PD).	18 Dal Consei 27.11.10
Pontadis dai 4 di Dicembar Prime pontade: I documents finanziaris de Regjon pal 2011 a son stâts al centri dai lavôrs des Comissions dal Consei, tra chestis ancje la cuinte che, tra lis altris, e viôt di culture, istruzion, lenghis minoritariis e sport. A son setôrs là che la ipotesi di tais, ancje avonde pençs, e à jevât une vore di discussions. Par chest, intant dai lavôrs di Comission, a son stâts fats diviers emendaments e altris a ‘nt rivaran in Aule. Intervistis ai conseîrs Enio Agnola (IdV), Roberto Novelli (PdL), Igor Gabrovec (SSk – PD), e Alessandro Tesolat (UDC).	19 Dal Consei 04.12.10
Seconde pontade: Il passaç dal analogjic al digjitâl al cjape dentri ta chestis zornadis ancje i Comuns dal Friûl – Vignesie Julie. Il Corecom al è impegnât sul teritori par spiegâ ce che chest cambiament al puarte e par rispuindi aes domandis e ai dubis dai citadins. In direte Paolo Francia (president dal Corecom).	20 Dal Consei 04.12.10
Pontadis 21-22 dai 11 di Dicembar Prime pontade: Pontade dedicade aes audizions in V Comission cul president de Regjon Renzo Tondo e cul assessôr Elio De Anna su lis politichis comunitariis dopo che, par vie dal iter une vore lent, 812 domandis di contribût par progjets comunitaris a son restadis fermis. Intervistis a Roberto Marin (PdL) e Franco Brussa (PD).	21 Dal Consei 11.12.10
Seconde pontade: Dibatiment in studi cun Alessandro Salvador (UDC) e Giorgio Baiutti (PD) sui lavôrs in I Comission su la leç finanziarie pal 2011.	22 Dal Consei 11.12.10
Pontadis 23-24 dai 18 di Dicembar Prime pontade Pontade su la aprovazion de bande dal Consei regjonâl dai documents finanziaris pal 2011 cun intervents di Alessandro Colautti (PdL), Roberto Asquini (Grup mist), Mara Piccin (LN), Paolo Menis (PD), Alessandro Corazza (IdV), Pietro Colussi (Cittadini).	23 Dal Consei 18.12.10
Seconde pontade: Si fevele des ativitâts de Comission paritât tra om e femine cu la presince de presidente di chest organisim regjonâl, Santa Zannier. In particolâr si viôt ce che la Comission e à puartât indenant dilunc vie dal 2010 e cuâl che al è il program des ativitâts pal 2011.	24 Dal Consei 18.12.10
Pontade 25 dai 25 di Dicembar Pontade conclusive dal cicli cu la presince in studi cul president dal Consei regjonâl Maurizio Franz. Intant de trasmission si à fevelât dal insediament di Franz tant che gnûf president dal Consei regjonâl dopo des dimission di Edouard Ballaman, di cuale situazion che si à cjatât denant e di cuâi che a son i impegns dal Consei regjonâl pai prossims mês, massime in teme di autonomie dal Friûl – Vignesie Julie e di svilup dal procès di trasferiment di podês dal Stât centrâl aes Regjons.	25 Dal Consei 24.12.10

Cjapâts pal cuel!

francesca — Tue, 29 Jun 2010 08:40:56 +0000

Achì disot us metìn a disposizion il test dal comunicât de cooperative Informazione Friulana / Radio Onde Furlane dât fûr intant de conference stampe che si è tignude a Udin ai 14 di Setembar dal 2010 e dulà che si à fevelât dai efiets de scancelazion dai fonts regjonâi pai programs in lenghe furlane su lis radios e su lis televisions locâls.

Cjapâts pal cuel!
La Regjon e gjave vie ducj i fonts pai programs par furlan su lis emitentis locâls

La aministrazion regjonâl di centri diestre, vuidade di Renzo Tondo e poiade di PdL, Leghe Nord, UDC e Pensionâts, e à metût in vore une politiche di riduzion des risorsis pe valorizazion e pe promozion de lenghe furlane. Cheste tindince e jere stade plui voltis confermade dal assessôr competent Roberto Molinaro che, intant di un incuintri cu lis realtâts associativis impegnadis inte promozion dal furlan, ancjemò sul finî dal an passât, al veve fevelât di un tai des risorsis ator dal 20%.
A vuê, in realtât, no vin ancjemò un cuadri complet des risorsis a disposizion intal 2010 pe lenghe furlane. Baste pensâ che, par esempli, no son stadis ancjemò comunicadis lis cifris dai contribûts pai ents ricognossûts di impuartance primarie pe lenghe furlane (cussì, di là dal tai dai fonts, chescj ents si cjataran a gjestî il probleme di rindicontâ dentri de fin dal an risorsis che ancjemò no son stadis nancjemò dadis fûr).
Il dât che però al lasse plui scaturîts al è l’azerament dai fonts pes convenzions cun emitentis radiofonichis e televisivis privadis pai programs in lenghe furlane (Art. 29, L.R. 15/96). Un dai setôrs vitâi pe promozion di une lenghe minorizade, ven a dî chel radiotelevisîf, si cjate cussì a passâ dai 200 mil euros dal 2009 (cifre une vore basse se si pense ae rilevance di chest setôr e ai siei coscj) al zero euros dal 2010, par altri cence che nissun no si sedi sintût in dovê di dâ nancje la plui piçule spiegazion.
Se la crisi economiche e à obleât dal sigûr a operâ dai tais ancje intes spesis de Regjon, al è ben vêr che a son stâts setôrs là che lis risorsis a son stadis confermadis o fintremai cressudis. A son sieltis politichis che a testemonein lis prioritâts de aministrazion regjonâl di cumò. Al è duncje palês che lis lenghis propriis dal Friûl – Vignesie Julie no son une des prioritâts de Zonte Tondo e dai partîts che le poiin.
Ancje cui che nol condivît cheste linie, in ogni câs, al varès podût acetâ une riduzion smirade des risorsis, ven a dî une riduzion fondade su criteris precîs tant che cualitât e valôr strategjic dai progjets finanziâts. L’azerament dai fonts pai programs par furlan su lis emitentis radiotelevisivis locâls, invezit, al è contrari a ogni logjiche di promozion linguistiche viodût che al è un setôr di impuartance primarie pe difusion des lenghis, ma ancje parcè che la continuitât di cualsisedi azion promozionâl e je fondamentâl par che e vedi sucès e parcè che, invezit di sostignî almancul i progjets di plui grande cualitât, si à vût miôr taiâ dut cence criteri.
Cussì si colpìs in maniere pesante ancje cui, tant che Radio Onde Furlane, di trente agns al lavore ogni dì pe difusion e pe valorizazion de lenghe furlane e lu fâs intal sisteme miôr, ven a stâi doprantle pe plui part de proprie programazion.
Cussì la Regjon, intant che e spint 200 mil euros ad an par une convenzion cu la RAI regjonâl pe produzion di nancje 30 minûts di programs radiofonics in lenghe furlane (5 dîs la setemane), e calcole dibant invistî ancje un sôl euro par convenzions cuntune radio che e prodûs tra lis siet e lis vot oris di programazion cuotidiane par furlan e che e dopre cheste lenghe pai siei programs principâi. Baste pensâ che di tancj agns Radio Onde Furlane e ufrìs un radiogjornâl cuotidian par furlan: un servizi unic e di utilitât publiche (intal stât talian, di fat, lis unichis comunitâts minorizadis che a à n un radiogjornâl inte proprie lenghe a son chês dotadis di un servizi di pueste ufiert de radiotelevision publiche!), ma che nol à mai vût un franc dai ents publics.
Lis risorsis che a divegnin des convenzions cu la Regjon, di fat, a cuvierzevin dome une part minime de produzion par furlan de emitente. Cun dut achel a ufrivin une bocjade di aiar pes financis de Radio, judantle a sostignî une ufierte di servizis largje, svariade e di buine cualitât. L’azerament di chestis risorsis, che si zonte ae riduzion dai contribûts pai ents ricognossûts di impuartance primarie pe lenghe furlane, al rapresente duncje un colp pardabon pesant no dome pes ativitâts svilupadis di Onde Furlane, ma ancje par difindi i puescj di lavôr che cheste e ufrìs.
La sielte fate de aministrazion regjonâl e va ancje cuintri di un dai siei principis plui sbandierâts, o sei la difese dai puescj di lavôr. La cooperative Informazione Friulana e da di vore a 7 dipendents a timp indeterminât, a un dipendent a timp determinât e si zove dal jutori di diviers colaboradôrs ocasionâi. No saran grancj numars, ma in câs di riduzion dal personâl o di sierade, tra i efiets si varès ancje une pierdite sigure sul plan de cualitât e de origjinalitât dal lavôr, des professionalitâts svilupadis, de interazion cul teritori. In peraulis puaris, la sierade o la riduzion al minim de cooperative Informazione Friulana e riscje di disterminâ un patrimoni metût adun in trente agns di lavôr al servizi dai furlans.
No si fevele dome di une emitente radiofoniche impegnade ogni dì inte difusion e inte promozion de lenghe furlane, ma di un subiet che al à davuelt e al va dilunc a davuelzi une funzion impuartante in tancj altris setôrs: struments linguistics (baste dî che e je stade la prime a produsi un dizionari e un coretôr informatic in lenghe furlane); musiche (e je la uniche emitente che e da grant spazi ae musiche locâl e, tant che organizadore dal Premi Friûl, e à dât une sburtade cence paragons al panorame musicâl par furlan); scuele (cun disinis di progjets in lenghe fats intes scuelis dal Friûl, baste pensâ a Radio Dîs); audivisivîfs (cu la produzion, par esempli, dal prin setemanâl di informazion televisîf dal dut par furlan); furlans emigrâts (cuntun servizi di streming radiofonic su cuatri fûs oraris diferents e une frecuence in Argjentine); imigrâts (cul prin program plurilengâl intal stât talian fat di une redazion di imigrâts e cun programs pe inclusion dai imigrâts inte realtât furlane specifiche); e v.i.
Colpî Radio Onde Furlane cun di plui al è un dam ancje pe libertât e pe pluralitât de informazion. In Friûl, di fat, si puedin contâ aromai sui dêts di une man i orghins di informazion indipendents dai grancj grups editoriâi e che la lôr proprietât e je intes mans di realtâts locâls. Cun di plui Onde Furlane e je une radio comunitarie e no comerciâl: une sielte che e impon la autoproduzion de plui part dai programs e une cuote limitade di publicitât, e che e je stade fate par favorî il rapuart cul teritori par mieç di informazion, aprofondiments, culture e trasmissions di servizi. La esistence e la autonomie de emitente a rapresentin duncje une ricjece par dute la comunitât regjonâl e, par cheste reson, a varessin di jessi difindudis di ducj, scomençant des istituzions locâls.
Ognidun al è clamât a rispuindi des sôs azions. De bande nestre, duncje, o cirarìn di fâ dut ce che al è in nestri podê par mantignî vive e salde cheste realtât che tantis altris comunitâts minorizadis intal stât talian (e no dome) nus invidiin. La Regjon e lis aministrazions locâls fasarano compagn o a laran indevant a strenzi la gale al cuel de lenghe furlane e di cui, tant che Onde Furlane, a â€˜nt testemonee ogni dì la vitalitât e lis potenzialitâts?

Udin, ai 14/09/2010

Il president di Informazione Friulana Soc. Coop.
Pauli Cantarut

La Lint

francesca — Wed, 27 May 2009 17:06:59 +0000

La lint e je un program curât di Gaia Baracetti che al à chê di informâ e di sensibilizâ la int su la presince di mafiis, ilegalitât e criminalitât organizade sei a nivel regjonâl, sei intal stât talian.

In prin plan ancje lis gnovis che a rivuardin la lote cuintri des mafiis e la promozion de legalitât.
La lint e va in onde ogni prin lunis dal mês a 5Â tal daspomisdì (17.00)e il tiarç joibe dal mês a lis dôs tal dopomisdì.

1.1-la-lint	2.2-la-lint
3.3-la-lint	4.4-la-lint
5.5-la-lint-060709	6.6 La Lint 03.08.09
7.7 La Lint 07.09.09	8.8 La Lints
9.9 La Lints	10.10 la lints
11.11 la lints	12.12 La lints

Internazionalitari

francesca — Thu, 26 Mar 2009 10:01:58 +0000

Internazionalitari al conte lis gnovis che a rivin des nazions cence stât e des minorancis nazionâls ator pe Europe. Achì si cjatin dome i file audio dai aprofondiments. Il test des gnovis e altris materiâi in plui, invezit, si pues cjatâju su www.internazionalitari.blogspot.com

19.01.10 Repression sui curdis in Turchie – Emine Ayna ( deputade BDP/DTP)

1 Internazion19.01.10

02.02.10 Situazion de çampe indipendentiste basche - Jone Goirizelaia (avocate / rapresentante Ezker Abertzalea)

2 Internazionalitari

16.02.10 Presentazion Babel Film Festival (Sardegne) – Tore Cubeddu (ideatôr)

03 Internazionalitari

02.03.10 Presentazion trienala ladina - Herwig Prinoth

4 Internazionalitari 02.03.10

30/03/2010

Situazion di rom e sinti intal stât talian

Dijana PavloviÄ (vicepresidente “Rom e Sinti insieme”)

30/03/2010Â Situazion di rom e sinti intal stât talian -

Dijana PavloviÄ (vicepresidente “Rom e Sinti insieme”)

6 Internazionalitari 30.03.10

13/04/2010Â Irlande dal Nord: atualitât, lenghe e memorie storiche -

Raymond McCartney (parlamentâr dal Sinn Fà©in)

7 Internazionalitari 13.04.10

27.04.10 Â Sentence “Egunkaria”: il cuotidian nol veve di sierâ – Â Giovanni Giacopuzzi (espert Paîs Basc)

8 Internazionalitari 27.04.10

11.05.10Â Seconde edizion “Aisciuda Ladina” -Â Sabrina Rasom (Ufici pai servizis linguistics dal Comprensori Ladin di Fassa)

9 Internazionalitari 11.05.10

25.05.10Â Irlande dal Nord: elezions e ricuart di Bobby Sands -Â Silvia Calamati (scritore, esperte Irlande dal Nord)

10 Internazionalitari 25.05.10

08.06.10Â Stât de leterature in lenghe basche -Â Edorta Jimenez (scritôr basc)

11 Internazionalitari 08.06.10

22.06.10 Il gnûf mensîl in lenghe sarde “Eja” -Â Diego Corraine (ideadôr de riviste)

12 Internazionalitari 22.06.10

06.07.2010Â Normalizazion linguistiche dal tamavês – Francesca Cattarin (operadore linguistiche, autore de gramatiche tamavese)

13 Internazionalitari 06.07.10

20.07.2010Â Corsiche: procès linguistics, culturâi e politics in at - Alessandro Michelucci (diretôr dal Centri di documentazion sui popui menaçâts)

14 Internazionalitari 20.07.10

03.08.2010Â Suns: semifinâl dal Liet International in Friûl – Leo Virgili (coordenadôr organizazion Suns)

15 Internazionalitari 03.08.10