Radio Onde Furlane cun Dek ill Ceesa e Michele Polo ator pes scuelis dal Friûl

“Radio Dîs” al torne intes scuelis furlanis cu la sô tierce edizion. Il progjet metût adun de ARLeF e di Radio Onde Furlane al è dut adun spetacul interatîf, trasmission radiofoniche e inchieste itinerante sul rapuart dai zovins cu la lôr lenghe native e cun chês altris lenghis feveladis inte nestre regjon, ancje chês puartadis de imigrazion.
Di Tumieç a Tisane, di S. Pieri a Manià: a son cutuardis i apontaments di “Radio Dîs” ator pes scuelis mediis e superiôrs dal Friûl là che l’animadôr / gjornalist Michele Polo e il rapper Andrea “Dek ill Ceesa” De Candido a van a scuvierzi, cun risultâts che dispès no si spietisi, cualis che a son lis lenghis che i fantats a fevelin di plui in famee e cui amîs, trop fuart che al è il leam cul furlan, cuâi che a son i mudaments puartâts de imigrazion intal cjamp linguistic e trop che e pese la lenghe intai rapuarts tra une gjenerazion e chê altre.

In onda su Radio Onde Furlane il martars e la joibe a une  e mieze  e in repliche la sabide e il lunis a vot e mieze di buinore.

Il progjet al è finanziât de ARLeF – Agjenzie Regjonâl pe lenghe furlane, e al è svilupât di Informazione Friulana – Radio Onde Furlane.

Flabis a mirinde a son contis de tradizion furlane interpretadis di Lussia di Uanis cun compagnaments sielts intun panorame musicâl internazionâl (dai Pink Floid fin ae Tecno e ai tambûrs gjaponês). A fasin part dal repertori des contis che di agns Lussia e conte ai fruts ator pes scuelis e pes bibliotechis, lassantju a cjapâ moscjis cu la bocje. Cualchi volte dongje des storiis a son ancje des filastrocjis des plui cognossudis tant che: Ursule Parussule; Il Belin e la Beline; La mê barete; 123; La vôs dai nemâi; e v.i. Gasparut di Issic e je invezit une conte in rime sul famôs Benandant di Issic scrite di Lussia di Uanis.

Su Onde Furlane al torne a partî Radio Dîs curât di Michele Polo, Gigi Patruno, Dek ill Ceesa e metût adun cu lis vôs dai arlêfs des scuelis mediis e superiôrs furlanis, integradis dai intervents di insegnants e referents scolastics. Il program al va in onde il miercus a une e mieze tal daspomisdì (13.30). La serie radiofoniche e je dome la part finâl dal progjet Radio Dîs, finanziât de ARLeF e metût adun de cooperative Informazion Furlane, editore di Radio Onde Furlane. Cun di fat, Radio Dîs al è prime di dut une conference – spetacul dulà  che si presente une cerce des ultimis produzions musicâls, cinematografichis, televisivis e dal web che a à n come element di fonde un ûs vîf de lenghe furlane. Intant di chescj incuintris a vegnin regjistradis lis vôs che po a deventin la materie prime des trasmissions radiofonichis. Dilunc vie dal an scolastic 2009/2010, il progjet Radio Dîs al ven presentât in 18 scuelis mediis e superiôrs des Provinciis di Udin, Gurize e Pordenon.