Inte Vierte di chest 2010 si è ricuardât l’inovâl des lotis dal Cormôr. Si fevele di timps di grande disocupazion che sul fonts a vevin il drame de emigrazion che cul timp al è deventât une costant pal Friûl. Ta chel contest une vore problematic, la confederazion sindacâl furlane e inmaneà il plan dal lavôr pal Friûl, che inte Basse al previodeve di sistemâ il Stele, il infuartì lis rostis dal Turgnan, e lavôrs sul Cormôr. Ta chê volte si davuelzè il siopar a ledrôs sul Cormôr, une grande lote coletive: comizis cun trê mil personis tes placis, sindacaliscj, ex partigjans, che a corevin sù e jù pe Basse in biciclete, i zovins, lis assembleis dai braçants, i comitâts di agjitazion, une lote che no puartà a grancj risultâts subit, ma che e apassionà tantis personis e tancj inteletuâi. Par ricuardâ chei fats, o proponìn une interviste fate di Adriano Venturini e Lorenzo Fabbro, a Guerrino Cecotti, classe 1932, che al è stât un dai protagoniscj ci chei events.

La cuestion dal dopleament de centrâl Edipower a Somplât di Cjavaç di diviers mês e inflame il dibatiment inte val dal Lâc, dopo che sul imprin i comuns di Trasaghis, Cjavaç e Verzegnis a vevin dit di sì ae opare. Di timp si è metût in vore un Comitât pe difese dal lâc che al viôt impegnâts citadins e aministradôrs de zone: tai ultins mês, lis aministrazions si son convintis a domandâ altris studis ae Regjon par verificâ l’impat che la opare e varà sul teritori. Di chê altre bande, il comitât, vuidât di Dino Rabassi, al à inmaneât une cunvigne in municipi a Cjavaç ai 11 di Jugn dal 2010: ta chê ocasion i doi gjeolics Roberto Cella e Dario Tosoni, e l’inzegnîr Dino Franzil, presentâts di Franceschino Barazzutti e dal conseîr regjonâl Enore Picco, a à n presentât dutis lis analisis che a à n fat e che a dimostraressin la pericolositât de opare. Radio Onde Furlane, inte suaze de iniziative “Radio Ator”, e jere presinte a chel incuintri, dulà che o vin regjistrât dute la cunvigne e il dibatiment seguitîf. Achì us fasìn sintî un struc di chê serade:

Cemût isal cambiât il paisaç furlan dilunc vie dal ultin secul? Al è il teme dal incuintri che Radio Onde Furlane e à inmaneât a Varian di Basilian intai mês stâts. Intant dal incuintri si à viodût une videointerviste che Adriano Venturini al à fat al architet Paolo De Rocco, impuartant studiôs dal paisaç furlan. De Rocco al partìs di une citazion leterarie, o sei la descrizion che Ippolito Nievo al faseve des tieris furlanis tal ’800, e le confronte cun chê di Pier Paolo Pasolini un secul dopo: in chês dôs descrizions si viôt che lis diferencis no son tantis come chês che si cjatin se o confrontìn chei tescj leteraris cul ambient che o cjatìn in dì di vuê. Di li si svilupe il resonament su trop che si ten vuê al paisaç ancje cun riferiment aes operazions di riordenament dal teritori.

I fossâi, lis armentariis e ducj i segnâi antropologjics che l’om al à lassât dilunc vie dai secui tal ambient de Basse furlane e cemût che a riscjin di sparî in dì di vuê a son al centri dal incuintri che si à fat te ostarie “Alì di Alme”, a Blessan di Basilian. In chê ocasion si à mostrât la videointerviste che Adriano Venturini al à fat al architet Moreno Baccichet, studiôs di paisaç. La cuestion dai cambiaments dal ambient causâts dal intervent uman e devente ancjemò plui atuâl vuê, massime cuant che si resone sul intervent che il consorzi Ledre – Tiliment al è daûr a fâ su lis canaletis par miorâ l’ûs de aghe par bagnâ i cjamps. Se di une bande al è just intervignî par sparagnâ e par no strassâ, di chê altre bande si à di cirî di no scancelâ par simpri olmis che a contin la storie de nestre tiere e de nestre int.

I prâts, i fondâi, i fossâi, elements fondants de culture di un popul a son stâts inmò al centri dai incuitnris che Radio Onde Furlane e à fat a Flaiban, dulà che a son stadis intervistadis di Adriano Venturini diviersis personis. Al centri de iniziative a jerin i parês e lis impressions de int de zone e su cemût che cheste e à vivût il riordenament fondiari dai agns passâts, che al à interessât une fondarie che une volte e leve jù di Cosean fintremai a Dignan.

Il flum Stele al à rapresentât un pont di riferiment pal disvilup di tantis comunitâts furlanis che dilunc vie dai agns e dai secui i à n vivût dongje. Ancje chest aspiet al è stât al centri dai incuintris che Radio Onde Furlane e à vût ator pal Friûl: di Flambri a Palçûl, fintremai a Prissinins, passant par Rivarote, Pocenie e Teôr, il nestri inviât Adriano Venturini al è lât a intervistâ la int dai puescj, che, sgarfant tai siei ricuarts nus à contât di cemût che e jere une volte, la vite ad ôr dal Stele.

“Un pretest plui che bon par fevelâ di ecologjie e ambient, e di progjets pe vivibilitât e pe sostignibilitât a tacâ propit dal lûc che al à ospitât la trasmission, ven a stâi la cjase Zero Energy fate sù e studiade in colaborazion cu la Universitât di Trent. Une struture che, tra lis altris robis, si pues controlâ e comandâ a distance cuntun celulâr.Une trasmission interessante, che la discussion e je partide propit dal concet di cemût e di dulà che al è nassût il progjet di cjase Zero Energy, par po svilupâ ducj chei altris temis impuartants a nivel ambientâl. Un dibatit che tra i ospits, dongje dal paron di cjase e president dal Grup Polo Le Ville Plus Loris Clocchiatti, al à viodût Alessandro Colautti, conseîr regjonâl dal PdL e president de I Comission dal Consei, il conseîr regjonâl dal PD Franco Iacop, Rino Gubiani de Universitât dal Friûl e espert di gnovis energjiis sostignibilis, e Stefano Teghil, assessôr provinciâl pe energjie.Il slogan de cjase Zero Energy al è: “Une cjase fate sù pal om e progjetade pal ambient”.

La regjstrazion, comentade di Pauli Cantarut, de gare poetiche davuelte a Codroip, te suaze dal Premi S. Simon, ai 23 di otubar dal 2010. Par cure di Lussia di Uanis e cu la colaborazion di Radio Onde Furlane e Trieste Poetry Slam.

Partecipants: Stefano Moratto, Maurizio Benedetti, Ferdinando Passone, Massimiliano Lancerotto, Christian Sinicco, Maria Sanchez, Furio Pillan, Velvet Afri, Daniela Turchetto, Luigina Lorenzini, Andrea Comina, Paolo Venti, Francesco Tomada, Erica Benfatto, Marilisa Trevisan.

Te foto i doi Slam Master mc: Lussia di Uanis e Raffaele Serafini.

Cuâl isal il futûr pe mont furlane, al centri di un fuart spopolâmint che aromai al va indenant di disinisdi agns. Tal inovâl dai nestris trente agns, si sin domandâts ancje chest e o sin lâts pardabon su in mont. O sin lâts aDordole, une piçule frazion di Mueç sot la Grauçarie cun si e no 50 abitants. Ta chel lûc o fin fevelât cun Emanuele Franz, un zovin che di chês bandis al à metût in pîts une cjase editore, la prime inte Alte Furlane. Simpri Dordole o vin cjatât Marina Tolazzi, che e je stade par agns diretore de nestre redazion e che cul so om Kaspar Nickles a àn inviât une aziende agricule cun chê di realizâ une dì ancje un pont di acêt par turiscj. Cun chestis personis, o vin fevelât di chescj progjets che a son ancje un piçul spont par imagjinâ des prospetivis futuris pe mont, se daûr al è cualchidun che i crôt e al à buine volontât.

Ai 15 di setembar, inovâl de seconde scosse dal taramot che si à vût in Friûl tal 1976, o sin lâts a Vençon par ricuardâ chel moment, ma soredut par capî cemût che e je stade puartade indenant la ricostruzion intun paîs che za prime al jere ricognossût tant che monument a nivel talian pe sô architeture e pes sôs carateristichis. Un zoiel, butât ju dal orcolat, che si è rivâts a tornâ a fâ come che al jere cun dutis lis buinis conseguencis che cheste sielte e à puartât massime pe cuestion dal turisim e de atrativitât che Vençon ancje in dì di vuê. Chest rasonament lu vin fat dentri dal museu da taramot de citadine cui ex sindics che a àn vuidât la ricostruzion, ven a stai Antonio Sacchetto, Duilio Copetti, Sergio Cescutti, e Fabio Di Bernardo che invezit al è assessôr e president de associazion dai sindics de ricostruzion.

I cjamps e l’ambient furlan nol è dome al centri de atenzion dome par sconvolziments che al podares patî se si interven sore cence atenzion, ma il paesaç furlan al è ancje un stimul sedi par cui che al fâs art, sedi par cui che lu lavore e al sielç di stâ dongje de tiere, e cui che lu vîf inte sô spiritualitât. Ta cheste pontade o fevelin cun Pre Toni Cjapielâr, tra i fondatôrs di Glesie furlane e vuê parochian a Ruvigne, cun Lisdero Valle, agricultôr a Nearêt di Cuar e cun Elio Ciol, fotograf di Cjasarse.

Dal confront tra esperiencis in Europe e in regjon a rivin il ricognossiment dal valôr economic de imprenditorie inte (e pe) lenghe e la indicazion operative a doprâ la lenghe proprie tant che “logo” par promovi il teritori e i siei prodots
Lis conclusions de cunvigne Minorancis linguistichis e imprenditorie. Lenghe, identitât, professionalitât organizade de cooperative Informazione Friulana pai siei trente agns di ativitât.

1_SLOVACCHIABratislava

2. SLOVACCHIA Svidnik

2_SLOVACCHIAsvidnik

3_Ukraine_Leopoli_Kiev

4_Romania_TulceaGreci5. ROMANIA Bucarest Transilvania

5_ROMANIA_bucarest transilvania

6_UNGHERIA_Budapest