Comunicazion istituzionâl

Servizis pes comunitâts locâls

Lis istituzions a son clamadis a jessi dongje dai citadins e a dâur lis informazions che a coventin judâju a partecipâ ae vite publiche e a doprâ pal miôr i servizis sociâi, culturâi e aministratîfs. Cun chescj intindiments a son clamadis a meti adun azions di comunicazion e di informazion di pueste che, intune tiere là che a esistin ancje altris lenghis, no puedin jessi fatis dome par talian.

Par chestis resons e par meti in vore la leç statâl di tutele des minorancis linguistichis storichis (la 482 dal 1999) diviers ents locâi, di bessôi o in plui di un, a àn dât a Onde Furlane la incarghe di realizâ progjets di comunicazion istituzionâl radiofonics o multimediâi. Al è il câs di InStantPIC, il spazi radiofonic dal Progjet Integrât Culture dal Friûl di Mieç cun aprofondiments su societât, culture, teritori e ambient metûts svilupâts adun cui sportei di lenghe furlane dai Comuns interessâts fintremai. Un altri esempli al è chel di Udin par furlan, iniziative fate pal Comun di Udin che e met adun une rubriche radiofoniche setemanâl, spazis informatîfs cuotidians, diretis e events dal vîf e un sît internet di pueste.

Tai ultins agns, la cooperative Informazione Friulana e à davuelt ancje altris servizis di interès public a pro des comunitâts furlanis. Al è il câs dai sportei pe lenghe furlane, previodûts de leç statâl 482 dal 1999. Servizis di cheste fate, par esempli, a son stâts svilupâts in diviers Comuns de Basse furlane tant che Cjarlins, Muçane, Sant Zorç di Noiâr e Tor di Zuin.

social shares
Torne insomp de pagjine