Leterature, documentaris e sperimentazions

Produzions di scoltâ

La ativitât radiofoniche e cjape dentri informazion, intratigniment musicâl e ancje altris produzions che a son pensadis sei pe radio che par une difusion e un ûs diferents. Informazione Friulana e Radio Onde Furlane a produsin une schirie di prodots di scoltâ, che a saltin fûr in formâts diviers e che a jentrin ancje tal palinsest di altris media.

Un formât “classic” intes produzions di Onde Furlane al è chel dai radiodramis che al compagne massime i prins agns di ativitât de radio, dentri de programazion ma ancje tal Premi Friûl. Un dai prins radiodramis produsûts, trasmetûts e po publicâts di Onde Furlane tal 1987 al è Prime di Sere di Carlo Sgorlon cu la regjie di Gianni Gregoricchio.
La leterature di scoltâ e torne però ancje plui di resint: un esempli al è Donald dal Tiliment, il radiodrame gjavât fûr dal romanç omonim di Stiefin Morat, che al nas intai studis di Onde Furlane e al ven mandât in onde de Rai regjonâl; un altri al è Sense, la version radiofoniche di un romanç di Checo Tam.

La produzion radiofoniche e cjape sù ancje altris formâts, dai radiodocumentaris – trasmetûts di Onde Furlane e po publicâts su cd tant che Tarvisio Banhof/Postaja Topolove di Loris Vescovo o ben produsûts par jessi mandâts in onde di altris come lis cinc pontadis di Terreno Divino di Renato Rinaldi e Andrea Collavino trasmetudis po di Rai Radio Tre – ai montaçs di vôs e sunôrs, fats in trasmissions tant che Hybrida Radio Show e Sister Blister o, prime inmò, dentri di chês di Massimo Toniutti.

Su lis frecuencis di Onde Furlane la leterature no si scolte dome in forme di radiodrame. Cun di fat, tes produzions e te programazion de radio a cjatin spazi ancje leturis di prose e di poesie, dai viers dai Trastolons a chei di Nelvia Di Monte e Umberto Valentinis, cul atôr e regjist Stefano Rizzardi, ai tescj dai autôrs di Contecurte e a chei pai fruts di Flabis a mirinde di Lussia di Uanis e dal progjet multimediâl Mariflabis.

social shares
Torne insomp de pagjine