MigrAzions

Il Friûl pal mont (e dal mont), il mont in Friûl

Il Friûl al è stât par tant timp une tiere segnade de emigrazion e ancjemò in dì di vuê a son tancj chei che a cjapin e a van pal mont. Cun di plui, al è stât e al è, massime in dì di vuê, une tiere di imigrazion.

Par vie de sô sensibilitât specifiche che e cuvierç il dialic tra culturis, la storie, lis tematichis sociâls, i dirits e la atualitât, la radio e à duncje contât e e va dilunc a contâ sei il Friûl che al è pal mont, sei il mont che al è in Friûl.

Onde Furlane e je un pont di riferiment – ancjemò di plui di cuant che al esist internet – pai emigrants furlans e soredut pai lôr fîs e nevôts che a jentrin in contat cu la radio par cirî e par cjatâ lis espressions culturâls contemporaniis dal Friûl. I furlans pal mont a son ancje protagoniscj de programazion de radio: des trasmissions bilengâls (furlan e spagnûl) metudis adun cul circul ALEF di Colonia Caroya al progjet Sgarfefurlans di Loris Vescovo, che tal 2008 al à vût il ricognossiment dal UNESCO che lu à metût inte liste dai progjets dal An internazionâl des lenghis.

Onde Furlane e je stade ancje une des primis radios dal stât talian, sul imprin dal agns Novante, a produsi e a trasmeti programs di pueste pai imigrâts, curâts cul lôr jutori diret e tes lôr lenghis. Tra i programs e i progjets dedicâts ae imigrazion e ae societât furlane che si insiore di gnovis componentis umanis e culturâls a meretin ricuardâts Tam Tam e Colôrs, ma ancje la esperience radiofoniche di Daniel Samba, Friûl piturât di neri.

Emigrazion e imigrazion a son ancje al centri di altris azions, tant che events, incuintris e prodots audiovisîfs, metûts adun cu la colaborazion di grups, associazions, istituzions locâls e altris entitâts che a operin ta chescj setôrs. Un esempli al è il program Jo o soi di Udin, fat tal 2014 cu la associazion Etrarte, un altri al è chel dai programs fats adun cu la associazion La Tela.

Dongje de emigrazion e de imigrazion e je ancje une tierce dimension dai moviments migratoris che a interessin il Friûl, o sei chê dai emigrants che a tornin, i “furlans dal mont”. Ancje chest aspiet al è stât cuviert di Onde Furlane cun trasmissions di informazion e di servizi tant che SIF in Onde. Informazions pai emigrants che a tornin in Friûl, metude adun cu la Clape Friûl dal Mont.

social shares
Torne insomp de pagjine