Musiche Furlane Fuarte & Suns

De esperience dal Premi Friûl e soredut dal so rinovament inviât inte seconde metât dai agns Novante, tal 1999 e nas la etichete Musiche Furlane Fuarte. Il so intindiment programatic declarât al è chel di sapontâ ducj i progjets «che a sburtin, che a sperimentin, che a disfin e che a tornin a fâ la musiche e la lenghe furlane».

Il catalic di Musiche Furlane Fuarte al met adun sù par jù cincuante titui. A son discs di grups e di soliscj che a doprin la lenghe furlane cun ducj i lengaçs musicâi: rock, reggae, pop, punk, grunge, hip hop, techno, jazz, sperimentazions variis. Tra di lôr ancje artiscj che a àn vuadagnât une cierte innomine, dentri e fûr dal Friûl.

Di esperiencis tant che chês dal Premi Friûl e di Musiche Furlane Fuarte al salte fûr ancje Suns, il Festival de Cjançon in lenghe minoritarie de Europe alpine e mediteranie nassût in Friûl intal 2009.
La manifestazion, inmaneade cul jutori de ARLeF (Agjenzie Regjonâl pe Lenghe Furlane) e adun cun altris sogjets furlans e di inaltrò, e cjape dentri grups e soliscj che a doprin lis lenghis minorizadis di Austrie, Cravuazie, Slovenie e Svuizare, dal stât talian e dal Sud di chel francês.

social shares
Torne insomp de pagjine