Premi Friûl

Creativitât in moviment

Une lenghe e je vive se e ven doprade tant che lenghe normâl in ducj i cjamps. De esperience de radio tal 1982 al nas il Premi Friûl, un concors metût adun cun chê di promovi la creativitât in lenghe furlane in diviers setôrs, de grafiche ai radiodramis, de fotografie ae musiche.

La formule dal premi e permet di fâ saltâ fûr tancj di lôr che za a provin a fâ alc di gnûf e di interessant par furlan e di sburtânt ancje di altris che magari no vevin mai pensât di doprâ la lenghe furlane in cheste maniere, cun snait e cun origjinalitât.

L’impat dal Premi Friûl al è une vore significatîf, soredut tal cjamp de musiche, che al devente chel batût cun plui costance e cun plui sodisfazion, ancje daûr dal numar, de varietât e de cualitât des propuestis. Tai prins agns a cjapin part al Premi corâls, grups folk, cjantants melodics, cjantautôrs e grups plui o mancul rock, ma cul passâ dai agns a son propit chestis ultimis dôs “categoriis” chês che a monopolizin il concors che tra l’altri, par cualchi an, al à ancje une sezion pe musiche sperimentâl e di ricercje.

A saltin fûr cussì soliscj e grups che a doprin il furlan cun ducj i gjenars musicâi: rock, reggae, pop, punk, grunge, hip hop, techno, jazz… Al è par chest che il Premi si specialize te musiche, nol promôf plui cjançons singulis ma, cul previodi une finâl dal vîf e la produzion di un cd pai vincidôrs, al sburte progjets cun plui cuarp e prospetive.

social shares
Torne insomp de pagjine