VINCIDORS 2013
ALDO SBADIGLIO E LA FAMIGLIA ANANAS

Segnalazion ai TRUC


Ai 18 di setembar si è sierade la votazion online pe asegnazion dal Premi dal Public.
Vincin cun 120 vôts i Ensemble d’Anjou che a si zontin tant che finaliscj ai 5 vincidôrs des seradis atôr

ensemble

Cjale i risultâts finâi

WORKSHOP
E JO O CJANTI (e o sai parcè)
Workshop par cognossi e creâ gnovis musichis furlanis

Agriturismo ai Vecchi Ippocastani
Vie Mazzini 21 Uanis (fraz. di Dael)  
Domenie ai 6 di Otubar 10.00 – 22.00

Docents
LINO STRAULINO
“Vile Vilans e Vilotis”
Lezion conciert sul repertori de tradizion

MARCO STOLFO

“La mê lenghe e sune il rock”
Friûl e Europe jenfri musichis e minorancis linguistichis

LEO VIRGILI
“La art dal miscliç” 
Arangjament musicâl jenfri tradizion e inovazion

STEFANO MONTELLO
“Peraule scrite, peraule cjantade”
I tescj de musiche furlane jenfri poesie e cjançon

JAM SESSION FINÂL
Il workshop al è gratuit, baste notâsi jenfri il prin di otubar mandant une email a premifriul@ondefurlane.eu

Storie in curt dal Premi Friûl
Il Premi Friûl al nas tal 1984. Radio Onde Furlane lu met adun cun chê di promovi la lenghe furlane e la creativitât par furlan. Il Premi sul inprin al cuvierç diviers cjamps, de grafiche ai radiodramis, de fotografie ae musiche, cuntune sezion Cjançons che e devente il setôr che al ven batût cun plui costance e cun plui sodisfazion, ancje daûr dal numar, de varietât e de cualitât des propuestis dai partecipants.

A cheste sezion dal Premi a cjapin part côrs, grups folk, cjantants melodics, cjantautôrs e grups plui o mancul rock, ma cul passâ dai agns a son propit chestis ultimis dôs “categoriis” chês che a monopolizin il concors, che tra lis altris par cualchi an al varà ancje une sezion pe musiche sperimentâl e di ricercje.

Il Premi al devente daurman une antene su ce che si môf ator, inte produzion musicâl par furlan, e un sburt pe nassite o pal disvilup di une schirie di progjets, cemût che si viôt a clâr, par esempli,  inte edizion dal 1987. In chê volte il concors di Onde Furlane al regjistre pe prime volte la partecipazion di un grup punk rock, i Aneurisma, e di une cjançon rap (Cjargne Hip Hop) e al viôt tra i siei protagoniscj une band de Basse che si clame Mitili Folk – che a deventaran FLK – e un cjantautôr cjargnel, che al veve za fat un disc tal 1983, Lino Straulino. Tant a dî: doi dai protagoniscj plui innomenâts di chê che di passe vincj agns e ven clamade “gnove musiche furlane”.

Tai prins agns Novante, intant che a cressin il numar e la varietât des propuestis di grups e di soliscj che a doprin la lenghe furlane par fâ musiche, la sezion Cjançons dal Premi Friûl si conferme un bon rilevadôr di dute cheste vivarositât. Ancjemò i Mitili e Lino Straulino, ma no dome lôr: a rivin i Società di Macinazione e i Fluidodinamika, lis soluzions techno eletronichis di X4U, i Arbe Garbe e i Bakan, Pit Ryan and the Mad Men Blues e Luigi Maieron, il trio Stefano Andreutti – Guido Carrara – Giulio Venier e Madrac e lis primis rimis de DLH Posse.

In chest contest si palese la necessitât di stramudâ la formule origjinarie dal concors. Il Premi si specialize in maniere esclusive te musiche e nol promôf plui lis cjançons singulis ma al favorìs e al sburte i progjets plui struturâts, stant che al previôt une finâl dal vîf e al met in pali la realizazion di un cd. Al è cussì che e nas la etichete Musiche Furlane Fuarte cun chê di sapontâ ducj i progjets «che a sburtin, che a sperimentin, che a disfin e che a tornin a fâ la musiche e la lenghe furlane».

I ultins dîs agns a son stâts chei de proliferazion di discs e progjets, dispès in stât di fâsi preseâ ancje fûr dal Friûl. E a son stâts ancje chei de incressite des “relazions internazionâls” dal Premi Friûl, che za a tacâ des sôs primis edizions al veve vude la partecipazion di furlans pal mont e di musiciscj di altris minorancis e nazionalitâts: tal 2002 al è nassût il Liet International, il festival european des cjançons tes lenghis minoritariis che doi agns indaûr al è stât organizât cun sucès in Friûl, e in cheste suaze dal 2009 al esist Suns, rassegne e concors che al costituìs la semifinâl dal stes Liet pe zone alpine e mediteranie.

Tal 2013 e rive la trentesime edizion dal Premi Friûl, che daûr de sô storie al mude ancjemò: cun plui apontaments dal vîf, a torzeon par dute la Patrie, e simpri cun chê di sburtâ l’ûs de lenghe furlane e di chês altris lenghis minorizadis dal Friûl in maniere creative e origjinâl inte produzion musicâl conteporanie.

Vincidôrs dal Premi Friûl

1982

  • Radiodrams: Giovanni Boltin

1983

  • Radiodrams: Alviero Negro

1984

  • Radiodrams: Sandri Di Suald
  • Contis: Giovanni Morsan

1985

  • Grafiche: Elisabetta Ursella

1986

  • Gjornalisim: Duilio Corgnali, Mauro Tosoni
  • Grafiche: Pischiutti/Ursella/Fabbro

1987

  • Cjançons: Raul Lovisoni
  • Audiovisîfs: Chucchiaro/Venturin/Viola
  • Contis: Renzo Balzan
  • Poesie: Jacun Vit
  • Teatri: Alviero Negro

1988

  • Cjançons: Liverani/Di Gleria
  • Audiovisîfs: Paolo Gallo
  • Ricercje: Claudio Moretti

1989

  • Cjançons: Montello/Zanier
  • Musiche sperimentâl: Ferigo/Paroni/Venturoso, Sivilotti/Giacomini
  • Imagjinis: Ulderica Da Pozzo

1990

  • il concors no si è davuelt

1991

  • Cjançons: Mitili Folk, Claudio Colaone
  • Musiche di ricercje: no assegnât
  • Imagjinis: Moretti/Ursella

1992

  • Cjançons: no assegnât
  • Musiche di ricercje: no assegnât

1993

    • Cjançons: Laura Rossi, Lino Straulino
    • Musiche di ricercje: Mario Pagotto

1994

    • Cjançons: Andreutti/Venier/Carrara, Maieron/Straulino
    • Radiocomediis: no assegnât

1995

    • Cjançons: Bakan, Ultrabraitan
    • Radiodrams: Giovanni Morsan

1996

    • Cjançons: ReddKaa
    • Fumuts: Pittis/Sciff, Simone Fantini

1997

    • Il concors no si è davuelt

1998

    • Musiche: Croz Sclizzâz

1999

    • Musiche: Prorastar

2000

    • Musiche: Pantan
2001

  • Musiche: Silvia Michelotti

2002

    • Musiche: Jonokognos

2003

    • Musiche: Parafangos

2004

  • Il concors no si è davuelt

2005

  • Musiche: Dek ill Ceesa

2006

  • Musiche: T.N.F.

2007

  • Musiche: R.Esistence in dub

2008

  • Musiche: Francis and the Phantoms

2009

  • Musiche: Orchestra cortile

2010

  • Musiche: Luna e un Quarto

2011

  • Musiche: Ulisse e I ciclopi

2012

  • Musiche: La bande eletriche

2013

  • Musiche: Aldo Sbadiglio e la Famiglia Ananas in vacanza a Dresda.
    Segnalazion ai Truc