Radio Dîs

Radio Onde Furlane cun Dek ill Ceesa e Michele Polo ator pes scuelis dal Friûl

“Radio Dîs” al torne intes scuelis furlanis cu la sô tierce edizion. Il progjet metût adun de ARLeF e di Radio Onde Furlane al è dut adun spetacul interatîf, trasmission radiofoniche e inchieste itinerante sul rapuart dai zovins cu la lôr lenghe native e cun chês altris lenghis feveladis inte nestre regjon, ancje chês puartadis de imigrazion.
Di Tumieç a Tisane, di S. Pieri a Manià: a son cutuardis i apontaments di “Radio Dîs” ator pes scuelis mediis e superiôrs dal Friûl là che l’animadôr / gjornalist Michele Polo e il rapper Andrea “Dek ill Ceesa” De Candido a van a scuvierzi, cun risultâts che dispès no si spietisi, cualis che a son lis lenghis che i fantats a fevelin di plui in famee e cui amîs, trop fuart che al è il leam cul furlan, cuâi che a son i mudaments puartâts de imigrazion intal cjamp linguistic e trop che e pese la lenghe intai rapuarts tra une gjenerazion e chê altre.
La prime part dal program e previôt une schirie di intervistis e di confronts là che i students a son invidâts, intune clime legre e informâl, a contâ lis lôr esperiencis e a resonâ su lis sieltis linguistichis personâls e de famee che magari a son usâts a dâ par scontadis. La seconde part e je invezit une conference – spetacul là che Dek e Michele, judâts di un repertori audiovisîf siôr, a mostrin la varietât e la vivarosetât de produzion culturâl par furlan e ta chês altris lenghis propriis de regjon. Si fevele di musiche, di informazion, di produzions televisivis e cinematografichis, di internet. A scjaldâ la atmosfere i pense po Dek ill Ceesa cun cualchi curte esibizion dal vîf compagnât, volte par volte, di altris musiciscj, poetis o operadôrs culturâi ospits di chê tape di “Radio Dîs”.
Lis vôs regjistradis dai students, cjapadis sù tes tapis di Radio-Dîs e montadis cun snait creatîf  di Michele Polo, si stramudin intune trasmission radiofoniche vivarose che e propon un montaç dinamic des vôs e des impressions racueltis che, a partî dai 8 di Març, e va in onda su Radio Onde Furlane (fm 90 mhz, o su internet: www.ondefurlane.eu) il martars e la joibe a une  e mieze (13.30) e in repliche la sabide e il lunis a vot e mieze di buinore (08.30). La scolte dal program, cul so miscliç di vôs gjenerazionâls, e devente un documentari sonôr pardabon interessant par cirî di capî   i moviments de lenghe tai zovins (simpri tal sît www.ondefurlane.eu si puedin scoltâ dutis lis puntadis des edizions precedentis di Radio-Dîs).
Il progjet al è finanziât de ARLeF – Agjenzie Regjonâl pe lenghe furlane, e al è svilupât di Informazione Friulana – Radio Onde Furlane.