Rêts europeanis

Tant che radio comunitarie, che e dopre pe plui part de sô programazion une lenghe minorizade, che e promôf creativitât e culture, che e prodûs e e promôf musiche, che e fâs informazion indipendente, che si impegne pai dirits linguistics e pal dialic interculturâl, e che e je gjestide di une cooperative, Onde Furlane e je un sogjet che par sô nature si met in relazion cun chei altris – istituzions, associazions, organizazions e grups di ogni sorte – in Friûl e intal rest dal mont.

In passe trente agns di ativitât, la cooperative Informazione Friulana e la “radio libare dai furlans” a lavorin in rêt cun diviers sogjets a nivel locâl, ma ancje intune dimension europeane e internazionâl.

Onde Furlane e aderìs ae rêt internazionâl des radios comunitariis (AMARC) intant che e manten contats strents cuntune schirie di media che a doprin une lenghe minorizade e di altris sogjets che a operin, ator pe Europe, tai siei stes cjamps, de radiofonie ae musiche, des migrazions ae culture.

La radio e la cooperative a son stâts e a son partners in diviers progjets e rêts europeanis. Lis relazions e lis competencis svilupadis ta chescj agns a àn viodût Onde Furlane e Informazione Friulana meti adun Suns, il Festival de Cjançon in lenghe minoritarie de Europe alpine e mediteranie nassût in Friûl tal 2009. Di resint la cooperative e je stade ancje un dai partners dal progjet Interreg IDcoop, dedicât aes impresis cooperativis e aes minorancis linguistichis.

social shares
Torne insomp de pagjine