Te lenghe e pe lenghe

Produzions editoriâls a 360 grâts

La ativitât radiofoniche e in particolâr chê des produzions leadis cu la leterature furlane e cjape dentri un rapuart specific cul mont dal teatri, tra comediis e sperimentazions, dal Teatro Incerto al Teatri Nazionâl Furlan.

Di li al nas ancje l’impegn de cooperative te editorie a stampe. Cun di fat, la prime produzion editoriâl de cooperative e je un propit Teatri par un Popul, un libri sul teatri cui tescj dai radiodramis de prime edizion dal Premi Friûl.

Di in chê volte a son saltâts fûr altris libris, des ricueltis di fumuts Sclabaç e Riviei di ingjustri (ducj i doi risultâts dal Premi Friûl) ae storie dai prins vincjecinc agns de radio par cure di Max Mauro (Un Friûl difarent. I 90 Mhz di Onde Furlane, dât fûr adun cul circul culturâl Menocchio) fintremai al saç di Marco Stolfo su la produzion musicâl contemporanie par furlan e in tantis altris lenghis minorizadis europeanis, La mê lenghe e sune il rock (e no dome chel). Friûl, Europe.
Dai libris la ativitât editoriâl si slargje po ancje a cd-roms tant che Suns, Vizije, Sprachen, Diritti (publicât cu la poie dal Consorzi Universitari dal Friûl e de Regjon Autonome Friûl – Vignesie Julie) e dvds tant che il documentari La radio libare dai furlans libars di Massimo Garlatti-Costa in coproduzion cu la Raja Films.
Un setôr specific al tocje la produzion di struments pe lenghe furlane, stant che al nas inte cooperative Informazione Friulana ancje dut il procès che, a tacâ dal dizionari ortografic Cemût si scrivial?, al puarte a meti adun diviers struments e servizis informatics che a àn une funzion strategjiche te alfabetizazion par furlan e tal ûs de lenghe in dutis lis formis di comunicazion.

social shares
Torne insomp de pagjine